ئابدۇللا ئابدۇرېھىم

ئابدۇللا ئابدۇرېھىم

                            ئابدۇللا ئابدۇرېھىم ئۆزىنىڭ پىكىرى چوڭقۇر، ﮬىسىياتقا ۋە تەسىرلەندۈرۈش كۈچىگە باي لېرىك ناخشىلىرى ئارقىلىق تاماشىبىنلارنىڭ قەلبىدىن چوڭقۇر ئورۇن ئالغان تالانلىق ناخشا چولپىنىدۇر. ئۇ 1969- يىلى 10- ئاينىڭ 1- كۈنى مارالبېشى ناﮬىيىسىنىڭ تۇمشۇق يېزىسىدا تۇغۇلغان. ئابدۇللا ئابدۇرېھىمنىڭ بالىلىق ﮬاياتى قەدىمى دولان مۇقاملىرى ۋە دولان مەشىرەپلىرى قۇچىغىدا ئۆتكەچكە ئۇنىڭدا ئاشۇ سەبى چاغلاردىن باشلاپلا سەنئەتكە بولغان كۈچلۈك ئىشتىياق شەكىللەنگەن.

مەكتەپ ھاياتى

1987- يىلى 5- ئايدا شىنجاڭ سەنئەت ئىنىستىتۇتى تىياتىر فالكۇلتىتىنىڭ بىر قىسىم ئوقۇتقۇچىلىرى مارالبېشى ناﮬىيىسگە ئوقۇغۇچى ئالغىلى بېرىپ، ئابدۇللا ئابدۇرېھىمدىكى يوشۇرۇن سەنئەت تالانتىنى بايقايدۇ-دە، ئۇنى سەنئەت ئىنىستىتۇتىغا قوبۇل قىلىدۇ. شۇ يىلى 9- ئايدىن ئېتىبارەن ئۇ ھەقىقىي سەنئەت ﮬاياتىنى باشلىدى. ئۇ سەنئەت ئىنىستىتۇتىدىكى ئوقۇغۇچىلىق ﮬاياتىدا بىر تەرەپتىن سەھنىدە ئوبراز يارىتىش ماھارەتلىرى ۋە تىياتىر بىلىملىرىنى ئۆگەنسە، يەنە بىر تەرەپتىن ناخشا سەنئىتىگە چوڭقۇر مۇھەببەت باغلاپ، ئاۋاز مەشىقىنى كۈچەيتىپ ، ناخشا ئورۇنداش جەھەتتە ئۆزگىچە ئاھاڭ، ئۆزگىچە ئۇسلۇب بىلەن بەلگىلىك ماﮬارەت يىتىلدۈردى.

نەتىجىلىرى

ئابدۇللا ئابدۇرېھىم 1991- يىلى 7- ئايدا ئوقۇشىنى تاماملاپ شىنجاڭ ئوپېرا ئۆمىكىگە تەقسىم قىلىندى ھەم ئۇزاق ئۆتمەي بۇ ئۆمەك تەييارلىغان «غېرىپ-سەنەم» ئوپېراسىدا غېرىپنىڭ دوستى ئېلىياسنىڭ رولىنى ئېلىشقا تاللاندى. 1992- يىلىنىڭ ئوتتۇرىلىرىدا بۇ ئوپېرا قازاقىستان، ئۆزبېكىستان قاتارلىق دۆلەتلەردە ئوينالغاندا ئابدۇللا ئابدۇرېھىم ئۆز ماﮬارىتىنى كۆرسىتىپ تاماشىبىنلارنىڭ ياخشى باﮬاسىغا ئېرىشتى.

ئابدۇللا ئابدۇرېھىم گەرچە تىياتىر ئارتىسى بولسىمۇ، لېكىن يەنە ئۆز نۆۋىتىدە ئەلگە تونۇلغان تالانتلىق ناخشىچىدۇر. ئۇ ئورۇنلىغان «سىرلىق تۇمان»، «ئۇچىراشقاندا»، «ۋاپادارىم»، «مۇئەللىم»، «كىچەلمەيمەن»، «ئايرىلىش»، «كۆزۈڭنى ياشلىما»، «تۇنجى سۆيگۈ»، «سېغىنىش كۈيلىرى» قاتارلىق ناخشىلار تاماشىبىنلار ئارسىدا زور تەسىر قوزغاپ، ئابدۇللانىڭ خەلق ئىچىدىكى شۆﮬرىتىنى يۇقىرى كۆتۈردى. 1994- يىلدىن ﮬازىرغىچە «سىرلىق تۇمان»، «سۈكۈتتىكى سادا»، «پەرۋانەڭ بولاي» قاتارلىق ئۈنئالغۇ لىنتىلىرى، «شىرىن چۈش»، «تۇنجى سۆيگۈ» قاتارلىق بىر قانچە MTV سى نەشىر قىلىندى. ئۇنىڭدىن باشقا ئابدۇللا 1998- يىلى 4- ئايدا پاكىستانغا ئويۇن قويغىلى بېرىپ، ئېقىن سۇدەك سۈزۈك ھەم مۇڭلۇق ئاۋازى بىلەن شۇ يەردىكى تاماشىبىنلارنىڭ ئالقىشىغا سازاۋەر بولدى. 1998- يىلىنىڭ ئوتتۇرىلىرىدا خاربىندا ئۆتكۈزۈلگەن مەملىكەتلىك ناخشا مۇسابىقىسىغا قاتنىشىپ «مۇنەۋۋەر ناخشىچى» مۇكاپاتىغا ئېرىشتى. يەنە شۇ يىلى شىنجاڭدا ئۆتكۈزۈلگەن «يېڭى ئادەم، يېڭى ئەسىر ناخشا مۇسابىقىسى» غا قاتنىشىپ، ئاممىباب ئۇسلۇبتا ناخشا ئېيتىش بويىچە 3- دەرىجىلىك مۇكاپاتقا نائىل بولدى ھەمدە 1- دەرىجىلىك ناخشىچى بولۇپ باﮬالاندى. 1999- يىلى بېيجىڭ، شاڭخەي قاتارلىق جايلاردا ئۆتكۈزۈلگەن «بىزنىڭ شىنجاڭ ياخشى جاي» ناملىق چوڭ تىپتىكى سەنئەت كېچىلىكىدە «ياشلىق كۈيى» دىگەن ناخشىنى خەنزۇچە ئورۇنلاپ زور ئالقىشقا ئېرىشتى. 1999- يىلى 9- ئايدا گېرمانىيەدە ئۆتكۈزۈلگەن «يىپەك يولى دىرامما بايرىمى» دا تەكلىپكە بىنائەن ئۆمەك رەﮬبەرلىرى بىلەن ئويۇن قويغىلى بارغان ئابدۇللا ناخشىلىرىدىكى مىللىيلىك ھەم ئاممىبابلىق بىلەن شۇ ئەل خەلقلىرىگە ئۆزىنى تونۇتتى. ئۇنىڭ يېقىملىق ئاۋازى، يارقىن سىماسى گېرمانىيە سەھنىلىرىدە پەيدا بولدى.

ئەسەرلىرى

بۇنىڭدىن باشقا ئابدۇللا ئابدۇرېھىم ئىلگىرى كىيىن بولۇپ «شادىمان دوستلار»، «بۇ كىشىنى تونۇمسىز» قاتارلىق تېلېۋىزىيە تىياتىرى، «گۇناﮬسىز جىنايەتكار»، «كېيىنكى ئاتا» قاتارلىق دىراممىلاردا ئاساسلىق روللارنى ئېلىپ، ئۆزىنىڭ پېرسوناژلارنىڭ نازۇك ئىچكى دۇنياسىنى ماھىرلىق بىلەن يورۇتۇپ بېرىشتەك ئالاھىدىلىكىنى نامايەن قىلىش بىلەن بىرگە يەنە «ئۇچرىشىش»، «شىكەر شەنبە»، «پۇل»، «ئۇنداق قازانغا مۇنداق چۆمۇچ» قاتارلىق ئېپىزوتلاردا ئوخشىمىغان يۇمۇرلۇق خاراكتىرگە ئىگە ئوبرازلارنى ناﮬايىتى مۇۋەپپىقىيەتلىك يارىتىپ تاماشىبىنلارنىڭ ناﮬايىتى يۇقىرى باﮬاسىغا ئېرىشتى. ئابدۇللا ئابدۇرېھىم ھەقىقەتەنمۇ ئەلگە تونۇلغان ئاتاقلىق سەنئەتكار بولۇپ، بىر قانچە يىلدىن بۇيان ناخشا ئېيتىش، دىرامما-ئېپىزوتلاردا رول ئېىلىش بىلەن چەكلىنىپ قالماي، يەنە مۇزىكا ئىجادىيىتى بىلەنمۇ شۇغۇللىنىپ، «قەبرىگە تۆكۈلگەن ياش»، «ئاي گۇۋاﮬ»، «ئۇر توقماق»، «كۈلكىگە يۇشۇرۇنغان يىغا» قاتارلىق تېلېۋىزىيە تىياتىرلىرىنىڭ مۇزىكىسىنى ئىشلەپ ۋە بۇ فىلىملەرنىڭ ناخشىسىنى ئورۇنلاپ، تاماشىبىنلار ئارسىدا زور تەسىر قوزغىدى.

ئابدۇللا ئابدۇرېھىمنىڭمۇ رومانتىك ﮬىسىياتقا باي ئاجايىپ مۇھەببەت كەچۈرمىشلىرى بولغان. ئۇ شىنجاڭ سەنئەت ئىنىستىتۇتىغا قوبۇل قىلىنغاندىن كىيىن، كۈتۈلمىگەندە ﮬازىرقى ئايالى ئامىنە ئۆمەر بىلەن ئۇچىراشتى. ئۆز-ئارا ساۋاقداشلىق ئۇلارنى ئاستا-ئاستا يېقىنلاشتۇردى. ئابدۇللا ئۆزىنىڭ ھىسىياتقا باي لېرىك ناخشىلىرى، ئېغىر-بېسىق مىجەز-خاراكتىرى ﮬەم سەمىمىيلىكى بىلەن ئامىنەنىڭ چوڭقۇر ئىشەنچىسى ھەم ﮬۆرمىتىگە ئېرىشتى. ئامىنەمۇ 1988- يىلى «بويتاقلار ئائىلىسى» ناملىق ھىكايە فىلىمدە تۇنجى قېتىم رول ئېلىپ ئابدۇللانى ﮬاياجانغا سالدى. شۇنىڭ بىلەن بۇ ئىككى ساۋاقداش 1988- يىلنىڭ ئاخىرى مۇﮬەببەت باغلاپ، كىيىنكى ساۋاقداشلىق ﮬاياتىنى تېخىمۇ گۈزەل ئارزۇ ئىستەكلەر ئىچىدە مەنىلىك ئۆتكۈزدى. 1991- يىلى 7- ئايدا ئوقۇشنى تاماملاپ بىرلىكتە شىنجاڭ ئوپېرا ئۆمىكىگە تەقسىم قىلىندى ھەمدە 1992- يىلى 10- ئاينىڭ 1- كۈنى بەخىتلىك ﮬالدا غۇلجىدا توي مۇراسىمى ئۆتكۈزدى. ﮬازىر ئۇلارنىڭ شاھناز ئىسىملىك بىر قىزى بار بولۇپ، باشلانغۇچ مەكتەپتە ئوقۇۋاتىدۇ.