تىمتاس كېچە قولۇمدا قەلەم،
سىزگە مەكتۇپ يازىمەن ئانا.
ئوتلۇق ھىجران چېچەكلىرىدىن،
سىزگە دەستە تىزىمەن ئانا.

كېچە ئۇزاق شۇنچىلىك سوغۇق،
مېھرىڭىزدىن تون يېپىڭ ئانا.
ئەللەي بىلەن ئۇخلىتىپ مېنى،
سۆيگۈ بىلەن ئويغىتىڭ ئانا.

كىممۇ سىزنى ھۆر-پەرى دېمەس،
دېڭىز تۇرسا مېھرىڭىز ئانا.
ھەر تۈن كېچە چۈشلەر قوينىدا،
كۆز ئالدىمدا چېھرىڭىز ئانا.
ئاھ جان … ئانا!

♪ ♪ ♪

بۇ ھاياتنىڭ داۋانلىرى كۆپ،
شادلىقىدىن غەملىرى تولا.
قايناملاردا ئۈزىمەن دادىل،
ماڭا ئامەت تىلەڭ جان ئانا.

ئۈنچە قازدىم بىلىم كانىدىن،
ئۈمىدىڭىز دىلىمدا ئانا.
دولقۇن ياساپ ئىشەنچ ئىرادە،
ۋۇجۇدۇمدا قېنىمدا ئانا.
ئاھ جان … ئانا!