چىنەڭگە ئاھ ئانا زەمزەم قۇيۇپ بېرەي دېسەم سەن يوق،
نېتەي، ئەجرىڭ ئۈچۈن پاقلان سويۇپ بېرەي دېسەم سەن يوق.

تۇتۇپ چىقماقنى ئويلايمەن ئۇچاڭنى تۈن بويى ئەمدى،
بېشىڭغا قوش تەكىي-ياستۇق قويۇپ بېرەي دېسەم سەن يوق.

ساڭا قانماي تۇرۇپ قەلبىم، ھاياتلىق قەۋمىدىن كەتتىڭ،
قويۇپ ئالدىڭغا قايناق چاي سۇنۇپ بېرەي دېسەم سەن يوق.

بالامنى ئالغۇچە ھەر تاڭ سېنىڭ ئالسامچۇ بوينۇمغا،
زۆرۈر بولسا ساڭا پەيتۇن بولۇپ بېرەي دېسەم سەن يوق.

سېنىڭ ئەجرىڭدە ئەر بولدۇم، ئېگىز شاخلارغا قول سۇنغان،
بىراق شاختىن ئانار-ئالما ئۈزۈپ بېرەي دېسەم سەن يوق.

سېنىڭ بارىڭدا قەدرىڭنى ھەجەپ بىلمەپتىمەن، ئەمدى،
ساڭا كۆيگەن بۇ باغرىمنى يېرىپ بېرەي دېسەم سەن يوق.