ھايات كۈتكەننى بەرگەيمۇ،
كۆزۈڭ تولغان بىلەن ياشقا.
يېنىپ كەلگەيمۇ كەتكەنلەر،
بېشىڭ ئۇرغان بىلەن تاشقا.

كۆزۈڭ كۈلسە كۆڭۈل كۈلمەي،
ھايات باشقا، ياشاش باشقا.
نېمە دېمەيدۇ ھەر كىملەر،
ئەلەم كەلمىگۈچە باشقا.

ھاياتتا ھەر نەپەس نېمەت،
ئوڭ- تەتۈرلىرى ھېكمەت.
ئۆمۈر شېرىن ئۆتەر دائىم،
قانائەت بولسا ساڭا ھەمرا.

كۆزۈم تويماس، كۆڭۈل قانماس،
ماڭا ئارمان يورۇق دۇنيا.
ئۆمۈر داۋامى يەتكەيمۇ،
سۆيۈپ سىلەرنى ياشاشقا.

ئىناقلىق گۆھىرى قالدى،
يىگىت- قىز بارمۇ ئاسراشقا.
قېرىنداش بارمۇ ئاسراشقا.